Kristbjörg Ásta,  Lífið

Sjálfsvíg=Sjálfselsk?

Ég eins og margir ólst upp með það hugarfar að sjálfsvíg væru sjálfselsk. Hugsunin sem ég var með til að styðja það var einföld, að manneskja skuli taka sitt eigið líf og skilja alla þá sem henni/honum þykir vænt um til að syrgja er sjálfselskt. En lífið er ekki einfalt, það er alltaf eitthvað meira bakvið tjöldin, það er þessi hlið sem ekki allir þekkja sem tekur völdin. Ég áttaði mig ekki á að þegar fólk fellur fyrir eigin hendi er það vegna veikinda. Fólk sem fremur sjálfsvíg er andlega veikt. Oft er það meira að segja búið að leita sér hjálpar en fær enga. Það er svo mikið meira í gangi heldur en þessi þröngsýna hugsun.

Þunglyndi er alvarleg veiki sem dregur fólk til dauða.

Ég áttaði mig aldrei almennilega á þessu fyrr en ég var 17 ára gömul og vanlíðan sem hafði verið til staðar hjá mér í mörg ár fór að aukast hratt. Mér fannst ég eitra allt sem var í kringum mig. Allt var erfiðara  út af mér. Væri heimurinn ekki bara betur settur ef ég væri ekki í honum? myndi fólkinu sem ég elska svo heitt ekki líða mikið betur? jú það myndi kannski syrgja fyrst, en ef við horfum fram á við verður lífið svo mikið betra án þess að hafa mig til að halda aftur af þeim. Þessar hugsanir tóku völdin. Það var svo augljóst hvað það yrði allt mikið betra ef ég væri ekki til, til að eyðileggja allt.

Í dag sé ég hversu veikar þessar hugsanir eru. En á þessum tíma virtist þetta vera rökrétt. Ég var heppin ég fékk hjálp áður en mér tókst að enda líf mitt. Ég komst inn á geðdeild og fór að vinna í sjálfri mér. Ég gæti ekki verið heppnari með þann stað sem ég er komin á í dag, en það eru ekki allir svo heppnir. Heilinn breytist, hugsanirnar breytast, veiki heilinn trúir því að það sé betra fyrir alla ef hann fer. Maður hættir að trúa að einn daginn verði ljós og maður verður uppgefin á að lifa með þennan þunglyndis djöful hangandi yfir sér. Ég er ekki að segja að allir hugsi eða upplifi eins og ég gerði en ég veit eitt fyrir víst að það er engin sjálfselska þarna bakvið.

One Comment

Leave a Reply

Your email address will not be published. Required fields are marked *